Дзяржаўная ўстанова культуры «Музей бітвы за Днепр»

Лоеўскі музей быў адкрыты 9 мая 1985 г. як «Музей бітвы за Днепр» – філіял Белдзяржмузея гісторыі Вялікай Айчыннай вайны. Музейны фонд складае больш за 5 000 адзінак захоўвання (2019). Экспазіцыя музея прысвечана падзеям фарсіравання Дняпра на Гомельшчыне войскамі Цэнтральнага фронту пад камандаваннем К. Ракасоўскага, баявым дзеянням 61 і 65 армій на Лоеўскім плацдарме і вызваленню раёна ад нямецка-фашысцкіх захопнікаў. Экспазіцыя таксама змяшчае матэрыялы аб партызанскім руху на Лоеўшчыне і аб земляках – удзельніках Другой сусветнай вайны. Вялікую цікавасць у наведвальнікаў выклікаюць падручныя сродкі пераправы першых дэсантных атрадаў, воінская амуніцыя, калекцыя зброі, баявыя ўзнагароды, франтавыя пісьмы і паштоўкі, фотаздымкі, асабістыя рэчы і дакументы ўдзельнікаў фарсіравання Дняпра, партызанскі дзённік баявых дзеянняў, газета, лістоўкі і інш. Экспазіцыю музея працягвае адкрытая пляцоўка баявой тэхнікі на беразе Дняпра. Музей бітвы за Днепр з'яўляецца мемарыяльным помнікам не толькі воінам-дняпроўцам, але і ўсім удзельнікам Другой сусветнай вайны.